అసలే వాళ్ళిద్దరిదీ ఎన్నో లెక్కలూ ఈక్వేషన్ల బరువుతో నలిగిపోయున్న సిటీ ప్రేమ. వేర్వేరు సిటీల్లో ఉద్యోగాలవటంతో ఇంకా పలచబడిపోయింది. అతని లోనైతే దాదాపు అడుగంటిపోయింది. ఈ నిజం ఆమెతో గడిపిన ఈ వీకెండ్‌లో ఖరాఖండీగా తేలిపోయింది. ఆమె మాత్రం, వెనక్కి తీసుకెళ్ళే రైల్లో కూర్చుని, ప్లాట్‍ఫాం మీద నిలబడ్డ అతని కళ్ళలోకి చూస్తూ, కిటికీ ఊచల మీద ఉన్న అతని చేయి నిమురుతూ, ఇంకా ఒక రిలేషన్‌‌లో ఉన్న నమ్మకంతోనే మాట్లాడింది. ఒక్క కుదుపుతో రైలు కదిలింది, ఆమె కూర్చున్న బోగీ నెమ్మదిగా దూరమైంది, ఆమె ఎప్పట్లాగే కిటికీ ఊచల్లోంచి చేయి బైటపెట్టి ఊపుతోంది. ఆ బోగీ మిగతా బోగీల వరసలో కలిసిపోయాక కూడా ఆ ఊగుతున్న చేయి ఒక్కటీ అలా కనపడుతూనే ఉంది. ఇన్నాళ్లలో అతనికి మొదటిసారి అనిపించింది– ఇట్నుంచి తిరిగి చేయి ఊపినా ఊపకపోయినా ఆమెకి ఎలాగూ తెలీదు కదా అని. దూరంగా ఆమె చేయి ఇంకా గాల్లో ఆడుతుండగానే, అతను చేతుల్ని ఫాంట్ జేబుల్లో దోపుకుని గేటు వైపు నడిచాడు.
